Kryeministri kanadez, Mark Carney, ka përkrahur të enjten mundësinë që vendi i tij të bëhet anëtari i parë i asociuar i Bashkimit Europian. Në fjalimin e tij para Parlamentit Evropian, Carney ka vlerësuar vazhdimisht bashkëpunimin mes Evropës dhe Kanadasë, por mbi këtë fjalim rëndonte marrëdhënia me SHBA-në. Tarifat e vendosura nga Trumpi dhe deklaratat e përsëritura për ta bërë Kanadanë shtetin e 51-të të SHBA-së, e kanë shtyrë Kanadanë të kërkojë një marrëdhënie shumë më të thellë ekonomike, të sigurisë dhe politike me Evropën. “Nuk po propozoj një bllok të tretë që synon të bëhet rival i një fuqie të madhe, por thjesht me sjellje më të kulturuar... Ne nuk kërkojmë pushtet për të dominuar të tjerët. Përkundrazi, ne po ndërtojmë qëndrueshmëri, në mënyrë që askush, askush të mos mund të kontrollojë tregjet tona të hapura dhe të cenojë sovranitetin tonë” I pyetur nga gazetarët, Trump ka deklaruar se marrëveshja e propozuar mes BE-së dhe Kanadasë mund të jetë një “akt armiqësor” dhe ka kërcënuar me tarifa të larta ndaj Europës. “Nëse ata e bëjnë këtë, mendoj se do të jetë një akt armiqësor. Do të vendos tarifa shumë serioze ose do ta ndaloj tregtinë me Evropën për shumë gjëra. Kështu që, nëse Europa e bën këtë me ndonjë qëllim të keq, atëherë unë do të vendos tarifa shumë të larta ndaj tyre” Kanadaja dërgon rreth 70% të eksporteve të saj në Shtetet e Bashkuara, duke e bërë atë shumë të ekspozuar ndaj tarifave të Trumpit. Ndërkohë, Evropa ka ndjekur një rrugë tjetër, duke hequr dorë nga masat hakmarrëse dhe duke pranuar tarifa deri në 15% për shumicën e eksporteve të BE-së drejt SHBA-së.