Teksa shumë komunitete në botë analizojnë ç’do të sjellë për ta rizgjedhja e Donald Trump, një fshat piktoresk italian në ishullin Sardenja e ka kthyer këtë në mundesi ripopullimi. Ashtu si zona të tjera rurale në Itali, dhe fshati i Ollolai përpiqet të bindë të huaj të mbushin shtëpitë e tij pas disa dekadash largimesh. Shtëpitë e lëna pas dore u jepen të ardhurve të rinj për një euro, me kusht zotimin e qëndrimit dhe riparimit të tyre dhe kësaj radhë oferta është drejtuar ndaj amerkanëve. “A je i lodhur nga politika globale? Kërkoni një stil më të balancuar jetese dhe mundësi të reja? Është koha të ndërtosh arratisjen tënde evropiane në parajsën e mahnitshme të Sardenjës”, thuhet në faqen e internetit të Ollolait. Kryetari i komunes tha për rrjetin CNN se faqja ishte krijuar posaçërisht për votues amerikanë pas zgjedhjeve presidenciale, duke shtuar se ai i donte amerikanët dhe shpresonin që ata të ringjallin komunitetin e fshatit “Për amerikanët kanë procedurë me hapa të përshpejtur pranimi, ne besojmë se ata do të vijnë të ringjallin vendin, ata janë shpresa jonë”, tha ai. Shumica e ndërtesave gjenden në qendrën historike dhe janë të masave të ndryshme. Ato janë shtëpitë piktoreske të fermerëve dhe barinjve të vjetër, të ndërtuar me gur. Amerikanët e ftuar në ishull mund të jenë të të gjitha moshave dhe profesioneve, por duhet të hapin një biznesi në fshat. Ata mirëpriten në fshatin malor që ngrihet mbi tokën e vjetër bujqësore me pamje të mrekullueshme, ku shpesh organizohen taverna me produktet e zonës apo karnavalet me maska që zakonisht mbahet në shkurt.