Mbrëmjen e së enjtes niveli i lumit Vjose arriti pikën kritike 8 metra, duke detyruar 10 familje që të evakuohen në Njësinë Administrative Novoselë. 7 familje janë nga fshati Novoselë dhe 3 nga fshati Fitore. Ndërkaq, edhe në Korçë ka pasur probleme prej reshjeve. Në Kamenicë përroi shkatërroi skarpatën dhe doli nga shtrati duke rrezikuar banesat. Sipas banorëve cilësia e dobët e skarpatës ka bërë që një pjesë e saj të shkëputet dhe uji të drejtohet drejt banesave. “Sic e shikoni, lumi ka grryer skarpatat të cilat nuk kanë një vit që janë betonuar që presupozohet që i bënë këta me 5 cm beton. Kanë plasur pllakat tek ura dhe na i kthen ujin në shtëpi. Jemi të rrezikuar! Kanë bllokuar rrugën, kanë vendosur dhe shirita mos kaloni, ne kemi të sëmurë në shtëpi. Rrezikohen të gjitha banesat, ja biznesi që është këtu afër i ka hyrë i gjithë uji brenda. I gjithë fshati këtu është, anës lumit. Thonë që është nën kontroll çdo gjë ku në fakt nuk është.” Probleme ka pasur edhe në aksin Delvinë – Kardhiq, pranë tunelit të Skërficës, paraqet rrezik ekstrem. Rruga është mbuluar nga gurë dhe dhera si pasojë e reshjeve intensive dhe përmbytjeve të orëve të fundit. Prurjet e mëdha të ujit kanë shkaktuar rrëshqitje masive.