Presidenti i Francës, Emmanuel Macron, ka ftuar liderët evropianë në një samit të hënën në Paris, pasi sipas tij, lëvizjet diplomatike të administratës Trump për Ukrainën po shqetësojnë Evropën. Lajmi u bë i ditur nga ministri i Jashtëm polak, Radoslaë Sikorski, i cili njoftoi se “kryeministri polak, Donald Tusk, do të marrë pjesë në një takim të liderëve evropianë të hënën me ftesë të presidentit Emmanuel Macron”, duke shtuar se “Ne duhet të tregojmë forcën dhe unitetin tonë”. Në Konferencën e Mynihut, ministri i Jashtëm i Francës, paralajmëroi vendime të vështira nga Evropa. “Europa do të duhet të marrë vendime të vështira dhe të bëjë sakrifica për të menaxhuar kërcënimet me të cilat përballet dhe për të garantuar sigurinë e saj. Duhet të përgatitemi. Do të na duhet të përballemi me ditë të vështira, të marrim vendime komplekse dhe madje të bëjmë sakrifica që nuk i prisnim deri më tani për të garantuar këtë siguri”, tha ministri i Jashtëm francez Jean-Noel Barrot. Ndërkohë, katër burime evropiane të cituara nga Reuters thanë se SHBA u ka dërguar një notë diplomatike kryeqyteteve evropiane duke i pyetur se çfarë mund të kontribuojnë në garancitë e sigurisë për Ukrainën.