Megjithëse me qeveri të përkohëshme , Greqia ka reaguar menjëherë në lidhje me vendimin e Spak-ut mesditën e së martës , ndaj kërkesës për lirimin e kryetarit të Bashkisë së Himarës Fredi Beleris. Në një deklaratë të shkurtër për shtyp në faqen zyrtare të saj ministria e Jashtme greke thekson: Refuzimi i sotëm i kërkesës së z. Beleris për lirim nga burgu, në mënyrë që të merrte detyrën si kryetar i ri i Bashkisë Himarë, pengon drejtpërdrejt betimin e tij dhe shkakton problematikë të thellë për qëllimet reale që qëndrojnë pas ndjekjes së tij.Ministria e Jashtme po ndjek me vëmendje zhvillimet dhe pret respektimin e së drejtës të pafajësisë deri në zhvillimin e gjyqit – element themelor i shtetit ligjor – nga vendi fqinj. Lajmi se kandidati i zgjedhur për kryebashkiak në Himarë do të vijojë të mbetet në burg, e kanë transmetuar të gjitha mediat greke që e konsiderojnë të ashpër reagimin e ministrisë së Jashtme greke, drejtuar Tiranës zyrtare. Madje ato theksojnë se avokati mbrojtës i z. Beleris ka deklaruar pas këtij zhvillimi se do të apelojë në Gjykatën e Lartë me të njëjtën kërkesë ,për lirimin e tij. Sipas gazetës Kathimerini , javën e kaluar, gjykata e Vlorës ka aprovuar rezultatin e zgjedhjeve që kanë nxjerrë fitues Fredi Belerin si kryebashkiak të Himarës, por siç nënvizohet përpjekja për lirimin e tij ka të bëjë edhe me mundësinë e prezencës personale në betimin e tij, në kuadrin e mbledhjes përkatëse të Këshillit Bashkiak Himarë. Në të gjitha mediat theksohet fakti se Beleris u arrestua më 12 maj, dy ditë para zgjedhjeve lokale me akuzën e blerjes së votave dhe se arrestimi dhe paraburgimi i tij ka shkaktuar reagime të ashpra si brenda Shqipërisë, ashtu edhe jashtë saj.