Franca votoi për zgjedhjet parlamentare dhe sipas të dhënave paraprake udhëheq bindshëm “Tubimi kombëtar” i Marine Le Pen. Këto zgjedhje u mbajtën pas tërmetit politik që shkaktuan zgjedhjet evropiane dhe goditjes së fortë që mori Emanuel Macron. Ashtu siç pritej, këto zgjedhje mund t'i japin vendit për herë të parë një qeveri të ekstremit të djathtë kundër presidentit Emmanuel Macron. Të parët që votuan ishin territoret jashtë shtetit, Kaledonia e Re, në Paqësorin Jugor. Dhe në orën 8 të mëngjesit u hapën qendrat e votimit edhe në Francën metropolitane, ku ishin thirrur të votonin 49 milionë qytetarë me të drejtë vote. Bumi i pritshëm i pjesëmarrjes në votime u konfirmua: 25.9% e votuesve, ose 1 në 4 prej tyre, kishin votuar brenda mesditës. Një përqindje që u rrit ndjeshëm krahasuar me raundin e parë të vitit 2022, kur vetëm 18.43% votuan në të njëjtën fashë orari. Partia “Tubimi kombëtar” kryeson bindshëm, ndonëse nuk e ka të sigurt arritjen e shumicës absolute. Nëse partia e ekstremit të djathtë do të sigurojë 289 vende në asamblenë kombëtare, ajo do t'i imponojë Macron një qeveri bashkëjetese duke zgjedhur Jordan Bardella si kryeministër. Megjithatë, nëse asnjë nga tre partitë konkurruese nuk do të arrinte objektivin e tyre, do të hapej një skenar kritik për kreun e shtetit, i cili do ta gjente veten me një Asamble Kombëtare të fragmentuar, me rrezikun e fortë të një vendi të paqeverisshëm. Votimi pritet të mbyllet në orën 20.00, por mbështetësit e Le Pen kanë nisur të festojnë.