Pak orë para se të zhvillohej ceremonia e hapjes së Lojërave Olimpike në Paris, kompania hekurudhore e trenave të shpejtë raportoi se kishte pësuar një "sulm masiv" i cili paralizoi lëvizjen e trenave. "Disa akte keqdashëse" prekën 3 nga 4 linjat kryesore të trenave, shpjegoi grupi hekurudhor. Ndërsa një burim tjetër i cilësoi si "akte sabotazhi" pasi u vunë zjarre të qëllimshme për të dëmtuar sistemet e linjave të shpejtësisë së lartë. Sipas mediave franceze, të paktën 800 mijë udhëtarë u prekën nga këto akte. Në stacionin Montparnasse dhjetëra njerëz janë ulur në tokë ose në tavolinat e lokaleve dhe restoranteve në pritje të udhëtimit të tyre me tren. Sabotimi kundër rrjetit hekurudhor francez të shpejtësisë së lartë ka detyruar kompaninë Eurostar të anulojë 25% të udhëtimeve që nisen nga Londra në Paris. Këtë e ka bërë të ditur vetë kompania hekurudhore, duke saktësuar se shqetësimet do të vazhdojnë edhe gjatë fundjavës dhe shërbimi normal nuk do të rikthehet para të hënës.