Zjarrfikësit francezë vijojnë betejën me flakët, ndërsa një valë e re e të nxehtit ka përfshirë vendin dhe ka rritur rrezikun për përhapjen e zjarreve. Në Gironde (Zhirond), zjarri masiv në perëndim të Bordosë mbeti i stabilizuar pas një nate të dytë të qetë, pavarësisht rritjes së temperaturave. Situata mbetet më problematike në rajonin juglindor të Varit, mes Marsejës dhe Nicës. Më shumë se 600 persona u detyruan të largoheshin nga banesat pasi një zjarr i ri shpërtheu përgjatë bregdetit të Mesdheut. Vatra e re u regjistrua më pak se një ditë pasi një tjetër zjarr në të njëjtin rajon ishte vënë nën kontroll. Një zjarr tjetër pyjor shpërtheu në Burgonjë duke përfshirë rreth 125 hektarë. Autoritetet vendore thanë se zjarri nuk shkaktoi viktima apo dëme në banesa. Franca është goditur këtë vit nga valë të njëpasnjëshme të të nxehtit dhe nga një thatësirë e madhe. Temperaturat ekstreme kanë tharë bimësinë e rritur pas reshjeve të shumta të fillimvitit, duke krijuar kushte të favorshme për përhapjen e flakëve. Që nga fillimi i vitit, zjarret kanë djegur rreth 92 mijë hektarë në Francë, sipërfaqja më e madhe e dokumentuar në dy dekadat e fundit.