Rusia, Bjellorusia dhe Irani janë ftuar nga fondacioni Nobel për të marrë pjesë në ceremonitë e ndarjes së çmimeve që do të zhvillohen për ngjarjet e vitit 2023. Ftesë i është dërguar edhe udhëheqësit të një partie të ekstremit të djathtë në Suedi, që ishte I ndaluar të merrte pjesë më parë. Vidar Helgesen, drejtori ekzekutiv i fondacionit privat tha në një deklaratë justifikoi ndryshimin e politikave me argumentin se dialogu për çështjet me pikëpamje të ndryshme po tkurret. Për të luftuar këtë prirje, tha ai, "ne po i zgjerojmë ftesat në shërbim të kuptimit të çmimit Nobel dhe rëndësinë e shkencës së lirë, kulturës së lirë dhe shoqërive të lira dhe paqësore". Ftesa iu dërgua të gjitha vendeve me misione diplomatike në Suedi dhe Norvegji si dhe tëgjitha partive politike që kanë përfaqësues në parlamentet e dy vendeve. Vitin e kaluar, të dërguarit diplomatikë të Rusisë dhe Bjellorusisë u ndaluan të merrnin pjesë në ceremonitë dhe drekat plot shkëlqim të çmimeve, të cilat zhvillohen gjithmonë më 10 dhjetor, për shkak të luftës në Ukrainë. Edhe ambasadorit të Iranit nuk iu lejua pjesëmarrja për shkak të “situatës së rëndë dhe në përshkallëzim” në vend. Çmimet Nobel ndahen në Stokhokm, përveç Çmimit për Paqen që jepet në Oslo. Lidhur me ndryshimin e politikave nga ana e fondacionit privat, Kryeministri suedez Ulf Kristersson tha të premten se nëse do të ishte në dorën e tij, nuk do ta kishte lejuar Rusinë të merrte pjesë në ceremoni. Fituesit e çmimit Nobel të këtij viti do të shpallen në fillim të tetorit. Pamejt: AFP