Viti 2026 e gjeti foltoren e Sali Berishës më të rrudhur, ashtu si dhe vetë mesazhet e kryedemokratit. Në takimin e parë të këtij viti poshtë zyrës së Edi Ramës, Berisha kishte vetëm një çështje, kapjen e Maduros, duke paralajmëruar të njëjtin fund dhe për rivalin e tij politik. “Edhe ti si maduro, në gjyq do përfundosh...” Thirrjen e Donald Trump se pas Maduros do të ketë të tjerë aksione, Sali Berisha e lexon si një paralajmërim për Ramën. “Presidenti Trump ka përsëritur se ti Maduro je i pari, të tjerë do vijnë pas teje dhe u ka dërguar mesazhe njëri pas tjetrit. E vërteta është se ky akt solli ngricë të madhe, tmerr, terror dhe ferr në Surrel. Edi Rama ngriu, e kyçi dje podkastin e tij ‘Mashtrojmë’, s’e çeli një fjalë goje”. Edhe pse numri i mbështetësve zvogëlohet, beteja e Sali Berishës për rrëzimin e Ramës do të vazhdojë, dhe tashmë jo vetëm para Kryeministrisë. “Ne nuk presim që forcat Delta të zbarkojnë në Surrel, se do zbarkojnë Deltat tona. Ja ku i kemi Deltat që do zbarkojnë në Surrel. Ja ku i ke Deltat. Këta Delta që i ke këtu para, priti në Surrel sapo të marrin urdhrin. Atje do i kesh”. Për Berishën, ky do jetë viti i opozitës dhe Edi Rama duhet të largohet nga pushtetit, pasi ka shndërruar zgjedhjet në farsë elektorale.