Ekonomia botërore po shkon nga kriza në krizë. Pas recesionit që ekonomitë e mëdha pësuan gjatë pandemisë, FMN shprehet në raportin e fundit të tetorit se perspektiva është e zymtë edhe për vitin 2023. Inflacioni dhe kriza energjetike po tkurrin ekonomitë globale, ndërsa rritja globale pritet të ngadalësohet në 2.7% vitin e ardhshëm, 0.2% më ulët se parashikimi që vinte nga korriku. Çmimet e larta do vazhdojnë të shoqërojnë ekonomitë anembanë globit edhe për të paktën dy vite. Ndërkohë përballë këtij fenomeni bankat qendrore po rrisin normat e interesit për të qetësuar kërkesën globale. Kjo mund të ndikojë në përkeqësimin e rënies ekonomike, ndërsa ndalimi i kësaj fushate mund të lejojë që inflacioni - të cilin FMN-ja e quajti "kërcënim direkt për prosperitetin aktual dhe të ardhshëm" - të rrënjoset thellë.