Fondi Monetar Ndërkombëtar njoftoi arritjen e një marrëveshjeje me Ukrainën për një paketë me vlerë 15.6 miliardë dollarë, një ndihmë e vyer kjo për vendin që vazhdon të mbrohet nga pushtimi i Ruisë. Financimi do të bëhet për një periudhë 4 vjecare. Kjo do të jetë njëra prej paketave më të mëdha financiare që ka marrë Ukraina pas nisjes së agresionit rus shkurtin e vitit të kaluar. Marrëveshja, e cila duhet të ratifikohet nga bordi i FMN-së, ka marrë në konsideratë rrugën e Kievit drejt anëtarësimit në Bashkimin Evropian pasi të përfundojë lufta. FMN-ja pret që bordi ekzekutiv ta miratojë ujdinë në javët në vijim. “Qëllimet kryesore të programit janë të mbështesin stabilitetin ekonomik dhe financiar në rrethana të pasigurisë jashtëzakonisht të lartë, të rivendosin qëndrueshmërinë e borxhit dhe të mbështesin rimëkëmbjen e Ukrainës në rrugën drejt pranimit në BE pas mbarimit të luftës”, pohoi në një deklaratë për shtyp zyrtari i FMN-së, Gavin Grey. Sipas Fondit Monetar Ndërkombëtar, ujdia pritet të ndihmojë në një financim të madh për Ukrainën nga donatorët ndërkombëtarë dhe partnerët, por nuk dha detaje. Zakonisht, kreditë e FMN-së mundësojnë mbështetje edhe nga Banka Botërore dhe institucione të tjera financiare.