Situata me zjarret vijon të jetë shqetësuese në disa zona, ndërsa aktive raportohet të jenë ende 9 vatra. Një operacion masiv për izolimin e flakëve po zhvillohet në zonën Gojan–Gjegjan në Pukë. Vatra mbetet aktive dhe paraqet rrezik sidomos në fshatin Gojan i Vogël ku flakët po kërcënojnë zonën e banuar. Për shkak të mungesës së plotë të rrugëve dhe terrenit të vështirë malor, mjetet zjarrfikëse e kanë të pamundur të ndërhyjnë nga toka. Për këtë arsye, po operohet nga ajri me 2 helikopterë. Sakaq situata në fshatin Gojan i Madh paraqitet më e qetë. Gjatë gjithë natës, forcat operacionale kanë punuar në terren duke izoluar pikat ku flakët po përparonin me shpejtësi. Mbi fshatin Gjegjan zjarri po përparon por aktualisht nuk paraqet rrezik për shtëpitë. Po ashtu raportohet se zjarri i madh i ardhur nga fshati Vrrith i Pukës ka depërtuar në territorin e Lezhës dhe mbetet aktiv në Malin e Kashnjetit. Flakët po përparojnë në drejtim të fshatrave Kashnjet dhe Kalivaç. Terreni ekstremisht i thyer e bën plotësisht të pamundur përdorimin e mjeteve zjarrfikëse. Po ashtu vijon të jetë aktive vatra nëe e zjarrit në fshatin Mal Milot, ndonëse gjatë natës është punuar pa ndërprerje me 35 forca bashkiake, 20 efektivë të Forcave të Armatosura dhe 4 mjete zjarrfikëse. Situata me zjarret paraqitet problematike edhe mbi fshatin Dukat. Operacioni paraqitet mjaft i vështirë për shkak të terrenit të thyer malor, ndërsa flakët rrezikojnë edhe Parkun Kombëtar të Llogarasë. Pëer këtë arsy që prej mëngjesit në ndihmë të forcave që punojnë nga toka shkuan edhe dy avionë. Zjarri masiv ka nisur që prej pasdites së të enjtes dhe po vazhdon të digjet në sipërfaqe të konsiderueshme. Dyshimet e para të autoriteteve flasin për një zjarrvënie të qëllimshme.