“Marrëveshja e Prespës ka vdekur”, thoshte në 2018-tën kreu i VMRO DPMNE-së, Hristian Mickoski, partia e të cilit nuk e ka fshehur asnjëherë kundërshtinë e saj ndaj ujdisë historike për emrin me Greqinë, e cila do t`i hapte Maqedonisë së Veriut rrugën e integrimit për në BE e NATO. Fitorja e kësaj partie nacionaliste tani, e cila triumfoi si në zgjedhjet parlamentare ashtu edhe ato presidenciale të 8 majit, duket ka ngjallur shqetësim në Athinë. Në një intervistë për televizionin Alpha, kryeministri grek Kyriakos Mitsotakis iu rikthye marrëveshjes së Prespës, të vulosur nga ish kreu i ekzekutivit grek Aleksis Tsipras dhe ish-kryeministrit maqedonas Zoran Zaev qershorin e 2018-ës. “Po i shoh me shqetësim disa nga deklaratat e zyrtarëve të VMRO-së dhe do të pres qëndrimin zyrtar të ushtruesit të detyrës së kryeministrit për të parë se si do t'i referohet emrit të vendit të tij. Unë vetë nuk kam qenë mbështetës i kësaj marrëveshjeje, por e pranova atë në kuadrin e vazhdimësisë së shtetit dhe sit ë tillë, e respektova. Të njëjtat kërkesa ekzistojnë edhe tani nga lidershipi i Maqedonisë së Veriut. Le të tregohemi pak të duruar, por dua të shpresoj se ajo që dëgjuam përpara zgjedhjeve nuk do të përbëjë edhe qëndrimin zyrtar të qeverisë së re, sepse nëse kjo ndodh, atëherë do të kemi problem”, ishte komenti i Mitsotakis, që më shumë ngjante me një paralajmërim. Shefi i ekzekutivit grek iu referuar shkurtimisht edhe vizitës së kryeministrit shqiptar Edi Rama, që zhvillon të dielën një takim me emigrantët në Athinë. “Greqia është një vend demokratik, çështja mori përmasa më të mëdha. Vendi nuk mund ta pengonte një lider të bënte një vizitë private dhe të fliste me bashkatdhetarët e tij”, u shpreh ai.