Një ushtar i forcave speciale amerikane është arrestuar pasi dyshohet se ka përdorur informacione të klasifikuara për përfitime financiare. Bëhet fjalë për Gannon Ken Van Dyke, i cili sipas Departamentit Amerikan të Drejtësisë ka vënë baste në platformën Polymarket mbi operacionin ushtarak sekret “Absolute Resolve”, gjatë të cilit forcat amerikane arrestuan Nicolas Maduro dhe bashkëshorten e tij Cilia Flores në Karakas, më 3 janar, të cilët më pas u transferuan në Nju Jork. Sipas hetimeve, ushtari ka fituar mbi 409 mijë dollarë nga bastet, ndërsa kishte investuar 33 mijë dollarë duke ditur paraprakisht detaje sekrete të operacionit. Departamenti amerikan i Drejtësisë e akuzon atë për përdorim të paligjshëm të informacionit konfidencial, mashtrim financiar dhe transaksione të paligjshme. Autoritetet theksojnë se përdorimi i informacionit të klasifikuar për përfitime personale është shkelje e rëndë e ligjit federal. Edhe kompania Polymarket ka deklaruar se e identifikoi aktivitetin e dyshimtë dhe bashkëpunoi me hetuesit. Ndërkohë, rasti po ndiqet dhe nga prokuroria federale në Nju Jork.Presidenti Donald Trump tha se nuk ishte në dijeni të rastit, por do ta shqyrtojë, duke shtuar se nuk është në favor të përdorimit të tregjeve të basteve për përfitime të tilla.