Mijëra turistë janë bllokuar në veri të Finlandës pasi fluturimet nga Aeroporti i Kittilës u pezulluan për shkak të temperaturave ekstreme. Sipas ABCnews, termometri në aeroport raportohet të ketë zbritur në -37 gradë Celsius. I ftohti i skajshëm, i cili ka zgjatur prej disa ditësh duke vështirësuar procesin e shkrirjes së akullit për avionët e duke penguar operacionet aeroportuale. Kittila ndodhet në rajonin e Laplandit, një zonë pak e populluar në veriun e Finlandës. Edhe pse janë të mësuar me dimra të ashpër, finlandezët këtë vit po përballen me temperatura më të ulëta se zakonisht. Kjo valë e të ftohtit ka prekur gjithashtu zona të gjera të Europës veriore, qendrore dhe lindore. Bora e dendur, erërat e forta dhe rrugët e mbuluara nga akulli kanë rritur rrezikun e udhëtimit në shumë vende të kontinentit të vjetër. Në Gjermani, përdoruesit e linjave hekurudhore u përballën me vonesa dhe anulime të shumta të dielën, pasi reshjet e dendura të borës detyruan operatorin Deutsche Bahn të ndërpresë të gjitha shërbimet në rajonet veriore. Autoritetet gjermane njoftuan gjithashtu se, për shkak të motit ekstrem, të gjitha shkollat në North Rhine-Ëestphalia — shteti më i populluar në perëndim të vendit — do të qëndrojnë të mbyllura dhe mësimi do të zhvillohet sot online. Ndërkohë, në Estoni dhe Lituani, autoritetet u bënë thirrje shoferëve të shmangin udhëtimet jo të domosdoshme për shkak të stuhive të parashikuara, ndërsa Letonia fqinje dha alarmin për reshje të dendura debore në perëndim të vendit.