Futbollisti koreano-jugor Hwang Ui-jo është dënuar me një vit burg me kusht pasi filmoi në mënyrë të paligjshme skena seksuale me një grua. 32-vjeçari, ish-sulmues i Norwich City dhe Nottingham Forest, luan aktualisht për klubin turk Alanyaspor. Ai gjithashtu ka qenë pjesë e kombëtares së Koresë së Jugut, por u pezullua në vitin 2023 pas akuzave kundër tij. Gjykata e Seulit deklaroi se “duke marrë parasysh seriozitetin e efekteve të dëmshme shoqërore të filmimeve të paligjshme, është e nevojshme që [Hwang] të ndëshkohet rreptësisht.” Megjithatë, u theksua se Hwang kishte shprehur pendesë dhe se videot ishin postuar në rrjetet sociale nga një palë e tretë. Gjatë paraqitjes së tij të parë në gjykatë në dhjetor, Hwang tha se ishte “thellësisht i penduar” për shkaktimin e “zhgënjimit.” Videot dolën në dritë pasi kunata e Hwang i publikoi ato në rrjetet sociale qershorin e kaluar, në përpjekje për ta shantazhuar. Ajo u dënua me tre vjet burg në shtator për shantazh, pasi Hwang e paditi atë.