Miliona njerëz përgjatë Bregut Lindor të Shteteve të Bashkuara të Amerikës po përballen me temperatura rekord, ndërsa nis fundjava e festës së 4 Korrikut (Dita e Pavarësisë). Periudha më e nxehtë e vitit deri tani po i çon temperaturat në nivele që, në disa zona, nuk janë parë prej dekadash. Vala e të nxehtit mund të ndikojë në aktivitetet e fundjavës, që janë parashikuar për 250-vjetorin e Pavarësisë. Kjo vjen pas një periudhe të paprecedentë të vapës në Evropë, me temperatura rekord në të gjithë kontinentin. Temperaturat përvëluese dhe lagështia e lartë nuk janë të pazakonta në Amerikën e Veriut. Megjithatë, shtrirja e gjerë e këtij fenomeni, që prek rreth 25 milionë njerëz në zonat qendrore dhe lindore dhe më pas gjithë lindjen gjatë fundjavës, e bën atë veçanërisht të rrezikshëm. Ndërkohë, Filadelfia regjistroi temperaturën më të lartë që nga viti 2011, 39°C. Të shtunën mund të ketë lehtësim të vapës në disa zona qendrore, por jo në lindje, ku temperaturat do të mbeten të rrezikshme për ata që marrin pjesë në aktivitete në natyrë. Një tjetër shqetësim janë stuhitë e forta në rrafshinat veriore, rajonin e Midwest-it dhe zonën e Liqeneve të Mëdha. Ato pritet t'i japin fund të nxehtit me breshër, erëra shkatërruese, përmbytje të menjëhershme dhe madje edhe disa tornado, njoftuan autoritetet. Deri të dielën, vapa do të intensifikohet në Virxhinia, Karolinën e Jugut dhe Veriut e juglindje, përpara se të përhapet drejt pjesëve perëndimore të SHBA-ve dhe Kanadasë gjatë javës së ardhshme. Paralajmërime për vapë janë gjithashtu në fuqi në pjesën më të madhe të Kebekut, përfshirë Montrealin dhe qytetin e Kebekut.