Top Channel/ Festa serbe me simbolet e luftës/Policia e Kosovës zhvesh serbët me sloganet provokuese

Qytetarë të shumtë serbë, këtë të martë u nisën për në Gazimestan për të festuar Vidovdanin. Për shkak të incidenteve në të kaluarën, këtë vit Policia e Kosovës kishte vënë në zbatim një plan operativ për mbarëvajtjen e festës. Në hyrje të oborrit ku ndodhet monumenti që nderon Betejën e Kosovës, policia kontrollonte çantat e secilit që synonte të merrte pjesë në manifestim. E ata që kishin veshur bluza me mbishkrime nacionaliste nuk u lanë të merrnin pjesë, pa ndërruar bluzën. Një numër i serbëve kishin veshur bluza të tjera mbi ato me shkrime e simbole, kështu që masat e kontrollit nga ana e policisë ishin të rrepta, ku i detyruan edhe t’i zhvishnin bluzat. Në Gazimestan u mbajt edhe një ceremoni fetare ku para masës folën prijës fetar.