Është rënduar në të paktën 55 të vdekur, qindra të lënduar e mbi 270 të zhdukur bilanci i tragjedisë në Hong Kong, ku zjarri që përfshiu një ditë më parë një kompleks banesash publike shumëkatëshe ende vazhdon. Flakët shkatërruan shtatë nga tetë blloqet e kullave në lagjen Tai Po. Zjarrfikësit kanë arritur të vënë nën kontroll zjarrin në katër prej tyre dhe shpresat janë që t`i arrijnë t`i fashisin flakët e mbetura deri në mbrëmje. Pyetjet që po shtrohen tani është se si nisi fillimisht zjarri dhe kush mban përgjegjësi për të. Tre drejtues kompanish ndërtimi janë arrestuar nën dyshimin e vrasjes nga pakujdesia, e lidhur kjo me materiale që ndizen lehtë përfshirë skela bambuje e fletë plastike, të cilat mund të kenë lejuar që flakët të përhapen shpejt. Hong Kongu është një ndër vendet e fundit në botë, ku ende përdoren skelat prej bambuje. Gati 2.000 apartamente me rreth 4.800 banorë ka kompleksi i banimit Wang Funks Court me gjithsej tetë kulla secila me nga 32 kate. Sikurse konfirmon qeveria e Hong Kongut, edhe një punonjës i zjarrëfikësit ka gjetur vdekjen prje flakëve. 37 vjeçari u gjet pa ndjenja në vendin e shërbimit dhe më pas ndërroi jetë në spital prej plagëve të marra.Zjarri u klasifikua si i nivelit pesë, niveli më serioz ky në Hong Kong. Nga Kina kreu i shtetit dhe i partisë Xi Jinping dërgoi ngushëllimet, sikurse njofton televizioni kinez. Ai siguroi mbështetje për rajonin me administrim të veçantë.