Tre persona përfunduan me masa sigurimi personal sipas një hetimi të Prokurorisë së Tiranës, nën dyshimet se prenë fatura fiktive me vlerë 370 milionë lekë për subjektin “5 Construction”. Ndaj Ilir Allmeta u dha “arrest në burg”, ndërsa ndaj Ermir Gjoklajt dhe Mirash Lulës “detyrim paraqitje”. Emrat e të dyshuarve dolën në hetimin paralel që po kryente SPAK ndaj një sërë zyrtarësh në dosjen “5D Construction”, një fashikull që, kur përfundoi në Gjykatën e Posaçme, u finalizua me moskompetencë për tre prej tyre. Duke bashkëpunuar me Drejtorinë e Hetimit Tatimor dhe Seksionin kundër Krimit Ekonomiko-Financiar, prokurori i kryeqytetit Ndini Tavani konstatoi në vazhdim se subjektet “Allmeta 02”, “TT” dhe “Valbona Alb” kanë kryer shitje të dyshuara fiktive në favor të subjektit “5D Konstruksion”. Me shitjen e faturave me vlerë 360 milionë lekë, u gjeneruan TVSH dhe Tatim Fitimi të përllogaritur në shumën prej 108,004,122 lekë. “5D Construction” dyshohet nga ana tjetër se ka rritur në mënyrë fiktive shpenzimet për punët publike të tenderuara nga Bashkia Tiranë, duke administruar dhe deklaruar faturat fiktive të lëshuara nga personat nën hetim. Skema mashtruese, sipas Prokurorisë, synonte përfitimin e padrejtë të kreditimit të TVSH-së dhe uljen e bazës së tatueshme për tatimin mbi fitimin, duke dëmtuar interesat financiare të shtetit.