Tre vite luftë kanë lënë Ukrainën në gërmadha dhe fatura për rindërtimin e vendit rritet çdo muaj. Sipas Bankës Botërore, dëmet e deritanishme arrijnë në mbi 589 miliardë dollarë, ndërsa vetëm për të nisur rindërtimin nevojiten të paktën 524 miliardë. Këto shifra u diskutuan në konferencë ndërkombëtare në Romë, me pjesëmarrje nga 77 vende dhe mbi 1,800 përfaqësues. Kryeministrja italiane Giorgia Meloni njoftoi se “mbi 10 miliardë euro” janë mbledhur deri tani, duke e cilësuar investimin në Ukrainë si një “investim në të ardhmen e përbashkët”. Sektori më i goditur është ai i strehimit, ku 13% e ndërtesave janë shkatërruar, duke lënë pa shtëpi mbi 2.5 milionë familje. Nevojiten 84 miliardë dollarë vetëm për banesat. Transporti dhe energjia janë gjithashtu sektorë kritikë, me dëme që kërkojnë 78 dhe 68 miliardë euro përkatësisht. Bashkimi Evropian po përgatit një paketë ndihme prej 100 miliardë eurosh, ndërsa ngrirja e aseteve ruse dhe përfshirja e sektorit privat mund të ndihmojnë në mbulimin e pjesës tjetër. Megjithatë, rruga drejt rindërtimit do të jetë e gjatë dhe e vështirë. Ekspertët llogarisin edhe dëmin njerëzor, ndaj sipas tyre nuk do të mjaftojnë as 600 miliardë euro për rimëkëmbjen edhe nëse lufta përfundon nesër.