Ish-kryeministri i vendit, Fatos Nano, vijon të jetë në gjendje të rëndë shëndetësore dhe po lufton për jetën, në një spital privat në kryeqytet. Ai ndodhet prej 11 ditësh në reanimacion dhe të hënën mësohet se pësoi një arrest kardiak, duke ja përkeqësuar gjendjen shëndetësore, ku aktualisht është në terapi intensive. Top Channel mëson se një ekip i specializuar mjekësor nga jashtë vendit mbërriti mbrëmjen e të hënës në Tiranë, që po monitorojnë gjendjen shëndetësore të liderit historik të Partisë Socialiste. Nga të dhënat nga spitali, mjekët theksojnë se problem konsiderohet rizgjimi i trurit si organi me vulnerabël, si pasojë e hypoksisë së zgjatur në kohën e arrestit kardiorespirator. Ish-kryeministri Nano shfaqi probleme me zemrën rreth dy javë më parë, teksa ndodhej në shtëpinë e tij. Ai u dërgua në spital me urgjencë, ku ndodhet në gjendje të rëndë. Ish lideri socialist, i cili kohë më parë trajtohej për problemet me frymëmarrjen për shkak të dëmtimeve të mushkërive, po përballet sërish me një emergjencë serioze mjekësore. citat “Pacienti ka disa ditë i hospitalizuar, në gjendje të rëndë pas një arresti kardiorespirator. Aktualisht pacienti konsiderohet ne gjendje shumë të rëndë ,me prognozë të rezervuar!”