Gjykata e Apelit të Tiranës ka caktuar datën 11 qershor në orën 10:00 për seancën e rigjykimit të çështjes së vulës së Partisë Demokratike. Relatore për çështjen ku do të vendoset se kujt i takon drejtimi i Partisë Demokratike, Sali Berishës apo Lulzim Bashës, do të jetë gjyqtarja Alma Ahmeti. Shorti i hedhur më 17 mars caktoi si pjesëtarë të trupës gjykuese edhe iliba Bezati dhe Elona Toro. Në 27 dhjetor të vitit të kaluar Gjykata e Lartë riktheu për rishqyrtim vendimin e dhënë nga Agron Zhukri që njihte si kryetar të Partisë Demokratike Sali Berishën. Aktualisht njihet si kryetar i PD-së, Lulzim Basha, ndërsa kundër tij është Sali Berisha dhe ai që njihet si grupi i Rithemelimit, por edhe deputetët e PD-së të drejtuar nga Gazment Bardhi, që në muajt e fundit njohin Berishën si kryetar të PD-së. Në arsyetimin e dhënë nga gjykata e Lartë theksohet se në vendimin e dhënë, janë bërë shkelje procedurale duke u interpretuar gabim normat dhe ligji procedural. Çështja e vendimit për vulën e Partisë Demokratike është në qendër të debatit në kampin opozitar që prej dhjetorit të vitit 2021.