Reform UK ka humbur avantazhin në sondazhe ndaj Laburistëve të fuqizuar nga popullariteti i kryeministrit të ri Andy Burnham, ndërsa vetë lideri i saj Nigel Farage është përfshirë në një seri skandalesh. Vetëm pak muaj më parë, mundësia që Farage të mbërrinte në Doëning Street dukej reale, por sot konsiderohet e mundshme që ai të largohet nga politika brenda vitit të ardhshëm. Goditja e fundit erdhi në prag të kongresit të ppartisë. Channel 4 publikoi një investigim ku gazetarë të maskuar si biznesmenë amerikanë shfaqeshin duke bindur dy këshilltarë të afërt të Farage për të pranuar financime të paligjshme. Vetë Farage më pas u takua për drekë me biznesmenët e rremë. Reform UK reagoi fillimisht me zemërim, duke folur për një tjetër komplot nga ana e establishmentit. Por më pas, dy këshilltarët u pezulluan nga partia, ndërsa Farage këmbënguli se “asnjë ligj nuk është shkelur”. Laburistët e referuan cështjen në polici dhe autoritetet britanike kanë konfirmuar se do ta shqyrtojnë. Farage është gjithashtu nën hetim parlamentar për një donacion prej 5 milionë paundësh apo rreth 6 milionë euro, të marrë nga një miliarder britanik i kriptomonedhave që jeton në Tajlandë, donacion ky të cilin Farage nuk e kishte deklaruar. Një tjetër hetim mund të hapet për përfitime që ai dyshohet të ketë pasur nga një aristokrat i dënuar më parë për mashtrim në Shtetet e Bashkuara. Ndërkohë, edhe policia po shqyrton financat e paqarta të vetë Reform UK.Në përpjekje për t'u përballur me akuzat, Farage dha dorëheqjen nga mandati i ligjvënësit gjatë verës dhe rikandidoi në të njëjtën zonë, duke thënë se donte të “gjykohej nga populli”. Edhe pse ai u rizgjodh deputet, pikëpyetjet mbi financat dhe të ardhmen politike të liderit të Reform UK mbeten ende të hapura.