Në të njëjtën kohë me stërvitjen më të madhe ushtarake të NATO-s prej dekadash, “Steadfast Defender 24”, zhvilloi një stërvitje ushtarake në Luf të Pukës edhe Grup-Batalioni i Këmbësorisë së Lehtë i Forcave të Armatosura. Stërvitjen “Mbrojtja e Qëndrueshme” e ndoqi nga afër edhe Presidenti Begaj i cili tha se Kjo njësi e certifikuar nga NATO konsiderohet si forcë e gatshme për dislokim dhe operim në ndërveprim të plotë me aleatët tanë, duke shtuar se ushtarët shqiptarë i japin natos mesazhin se e ka të mbrojtur krahun e saj juglindor. “Është me rëndësi që edhe Forcat tona të Armatosura të jenë në lartësinë e sfidave të kohës. Jo shumë larg nga këtu, prej dy vjetësh, vijon agresioni i paligjshëm rus ndaj Ukrainës. Edhe rajoni ynë, Ballkani Perëndimor, i cili ka vuajtur nga historia e konflikteve dhe përplasjeve ka një situatë sigurie të brishtë. Aktorë me ambicie gjeo-politike kundër vlerave Euro-Atlantike mund të shfrytëzojnë dobësitë dhe aleancat ideologjike apo etnike në rajon për të hapur vatra të reja konflikti. Prej më shumë se një viti, siguria në veri të Republikës së Kosovës është cenuar disa herë. Shqipëria qëndron gjithnjë krah Kosovës në rrugëtimin e saj si shteti më i ri i Evropës. Ne e bëjmë këtë, jo thjesht se jemi dy shtete të një kombi, vëllezër të një gjaku, por sepse mbështetja për Kosovën është mbështetje për sigurinë, paqen dhe të ardhmen në rajon” Në këtë kontekst, tha Presidenti kjo stërvitje merr një tjetër kuptim dhe rëndësi. Ju, si pjesëmarrës në këtë stërvitje, dhe e gjithë trupa e Forcave të Armatosura, jeni vija e parë e mbrojtjes dhe garantimit të sigurisë dhe paqes.