Autoritetet ndërkombëtare po intensifikojnë masat pas shpërthimit të hantavirusit në anijen MV Hondius, ndërsa raste të dyshuara po hetohen në Spanjë dhe në ishuj të largët britanikë në Atlantik. Pasagjerët e kroçerës do të evakuohen pranë Tenerife-s nën masa të rrepta sigurie, ndërsa SHBA ka nisur organizimin e fluturimeve të posaçme për qytetarët amerikanë që ndodhen në bord. Ndërkohë, protestat në portin e Tenerife-s dhe karantinimet e reja tregojnë shqetësimin në rritje për përhapjen e virusit Andes. Një stjuardesë e kompanisë ajrore holandeze KLM, e cila kishte pasur kontakt me një pasagjere të infektuar dhe më pas shfaqi simptoma të lehta, rezultoi negative për hantavirusin. Pasagjerja bashkëshortja e personit të parë që humbi jetën kishte qenë për pak kohë në një avion nga Johanesburgu drejt Holandës më 25 prill, por u largua nga avioni përpara ngritjes. Ajo ndërroi jetë një ditë më pas në një spital të Johanesburgut. Autoritetet spanjolle thanë se një grua në atë fluturim po testohet për hantavirus, pasi kishte zhvilluar simptoma në shtëpinë e saj në lindje të Spanjës. Ajo ndodhet në izolim në spital. Dy banorë të Singaporit që kishin qenë në anije rezultuan negativë për virusin, por do të mbeten në karantinë, njoftuan autoritetet lokale. Anija MV Hondius u nis nga Ushuaia në Argjentinë më 1 prill për një kroçerë përtej Atlantikut drejt Kepit Verde. Tre raste të dyshuara, përfshirë dy anëtarë ekuipazhi që më vonë rezultuan pozitivë, u evakuuan drejt Holandës. Një YouTuber që ndodhet në bord, Kasem Ibn Hattuta, deklaroi se pasagjerët u qetësuan pasi mjekë iu bashkuan anijes. Sipas tij, njerëzit po mbajnë maska në ambientet e brendshme dhe po ruajnë distancën. Shtetet e Bashkuara njoftuan të premten se po organizojnë një fluturim evakuimi për amerikanët që ndodhen në anije, të cilët më pas do të dërgohen në një qendër karantine në Nebraska. Autoritetet spanjolle kanë bërë të ditur se anija do të ankorohet pranë Tenerife-s dhe nuk do të lejohet të hyjë në port. Pasagjerët do të transportohen fillimisht me një mjet më të vogël drejt tokës dhe më pas me autobus drejt aeroportit. Evakuimi duhet të përfundojë mes të dielës dhe të hënës për shkak të motit të keq që pritet më pas, thanë autoritetet rajonale të Ishujve Kanarie. Ndërkohë, punonjësit e portit në Tenerife protestuan të premten kundër mbërritjes së anijes. Kroçera kishte ndaluar edhe në disa ishuj të largët britanikë në Atlantikun Jugor. Autoritetet britanike të shëndetësisë njoftuan të premten për një rast të dyshuar në Tristan da Cunha, një nga vendbanimet më të izoluara në botë me rreth 220 banorë.