Nisin negociatat e para zyrtare për shtensionimin e situatës mes Izraelit dhe Iranit. Diplomatët kryesorë të Evropës po zhvillojnë bisedime me ministrin e Jashtëm të Iranit, në Gjenevë, me në fokus shqetësimin për programin bërthamor të Teheranit, që nxiti luftën mes dy vendeve. Ministri i Jashtëm i Iranit, Abbas Araghchi, mbërriti në një hotel në qytetin zviceran për takimin me homologët e tij nga Franca, Gjermania dhe Mbretëria e Bashkuar, si dhe me shefen e politikës së jashtme të Bashkimit Evropian. Ky është takimi i parë ballë për ballë midis zyrtarëve perëndimorë dhe atyre iranianë, që nga fillimi i konfliktit më 13 qershor. Para takimit, Araghchi tha se vendi i tij “nuk ka asgjë për të biseduar” me Shtetet e Bashkuara për sa kohë Izraeli i vazhdon bombardimet ndaj Iranit, por shtoi se është i hapur për “dialog” me të tjerët, megjithëse jo për negociata. Nga ana e tij, Sekretari i Jashtëm i Britanisë së Madhe, David Lammy, i cili udhëtoi drejt Gjenevës pas takimit në Uashington me Sekretarin e Shtetit, Marco Rubio, tha se “ka një mundësi që gjatë dy javëve të ardhshme të arrihet një zgjidhje diplomatike”. Ndërkohë, edhe sot vijuan sulmet me dy vendeve, duke lënë dhjetëra të plagosur. Ushtria izraelite njoftoi pak më herët se nuk do të rri duarkryq përballë kërcënimeve të Iranit dhe se është e përgatitur. “Ne kemi nisur fushatën më komplekse në historinë tonë për të hyequr një kërcënim të një madhësie të tillë, kundër një armiku të tillë, ne duhet të jemi gati për një fushatë të gjatë dhe luftë në disa fronte”, tha shefi i shtabit të Izraelit. Mbretëria e Bashkuar njoftoi se po tërheq stafin e saj nga ambasada në Teheran, për shkak të përshkallëzimit të situatës. “Ne po tërheqim përkohësisht stafin nga Irani. Ambasada jonë vazhdon të veprojë nga distanca”, njoftoi Zyra e Jashtme e Britanisë, e cila më herët njoftoi se ka tërhequr familjarët e stafit të ambasadës dhe konsullatës në Izrael.