Një valë e re e të nxehtit ekstrem po godet Italinë dhe një pjesë të madhe të Evropës, me temperaturat që pritet të arrijnë deri në 45 gradë Celsius në disa zona gjatë ditëve në vijim. Për të tretën herë brenda pak javësh, autoritetet italiane kanë shpallur alarm të kuq për disa qytete. Sot niveli maksimal i rrezikut është në fuqi për Firencen, Peruxhian, Breshian dhe Torinon, ndërsa nga e mërkura listës do t’i shtohen edhe Roma, Bolonja dhe Frosinone. Autoritetet u bëjnë thirrje qytetarëve, veçanërisht të moshuarve, fëmijëve dhe personave me probleme shëndetësore, të shmangin daljet gjatë orëve më të nxehta të ditës. Sipas meteorologëve, temperaturat do të luhaten nga 39 deri në 41 gradë Celsius në pjesën më të madhe të Italisë qendrore dhe jugore, si dhe në ishullin e Sardenjës. Në disa zona të brendshme, termometri mund të shkojë deri në 45 gradë, duke e bërë këtë një nga periudhat më të nxehta të kësaj vere.