“Bashkimit Europian i duhet një plan për ribashkim”, u shpreh kryeministri Edi Rama, duke argumentuar se Shqipëria dhe vendet e tjera të Ballkanit, janë brenda kufijve evropianë. Në fjalën e tij në Kolegjin e Evropës në Bruzh të Belgjikës, Rama theksoi se Bashkimit Evropian i duhet ribashkimi. “Jacques Delors tha se Europa është rrëfenjë vullneti dhe ky vullnet na duhet për të bashkuar Europën. Dhe nuk e kuptoj fjalën zgjerim të them të drejtën sepse kur një organizëm zgjerohet tregon se zgjerohet perimetri i saj, ndërkohë ne nuk jemi jashtë Europës sot, ndaj ky është thjeshtë një ribashkim. Dhe të mos harrojmë se Bashkimi Europian është realiteti i parë në historinë e hartave dhe të gjeopolitikës me dy kufi, një të jashtëm e një të brendshëm”. Duke përdorur metaforat, kreu i qeverisë tha se Ballkani është në rrugën e duhur drejt integrimit në Bashkimin Europian. Përballë sfidave, shtoi ai, duhet që unioni të pozicionohet si një forcë qendrore për diplomacinë dhe ndërtimin e paqes në skenën botërore. “Ballkani është si një fetus në mitrën e një gruaje shtatzënë. Mendoj se më në fund jemi në rrugë të mbarë. Jam i sigurt që kur nisi puna dhe Frederiksen pa studentët e parë që takoi, ndjeu keqardhje për ta, duke menduar, ‘ju nuk dini asgjë se çfarë është jeta jashtë për këdo që ëndërron të bëjë diçka në Bruksel’. Por, gjërat kanë ndryshuar. Evropa, BE janë dy fjalë të lidhura në një, që është paqja, dhe paqja ka qenë arsyeja e lindjes së tij, duhet të jetë arsyeja e së ardhmes. Si mund ta lëmë këtë krijesë të mahnitshme të kthehet në një makineri lufte. Evropa ka nevojë për një plan, duhet të ofrojë garanci sigurie për Ukrainën, të projektojë një rrugë të qartë për ribashkimin e plotë të Europës dhe të mbajë derën hapur për përfshirje më tej, duke u pozicionuar si një forcë qendrore për diplomacinë dhe ndërtimin e paqes në skenën botërore”. Pas çeljes së katër grupkapitujeve, kryeministri, që theksoi se shqiptarët janë populli më proevropian, u shpreh optimistë edhe për hapjen e pesë kapitujve të tjerë brenda këtij viti. “30 vite më parë, Shqipëria ishte një papafingo e harruar e kontinentit, sot është këtu. Dhe ka ardhur pasi ka çelur dhe 4 kapituj të tjerë, kanë mbetur edhe 5, me shpresë brenda këtij viti, që është një rekord. Është një shpejtësi që befason edhe priftërinjtë dhe arqipeshkvët e Brukselit, që është edhe më e vështirë se të befasosh Perënditë. Mbështetja e Shqipërisë për BE-në është 92%, thashë kështu ka qenë edhe për Perandorinë Osmane, sepse jemi besnik ndaj miqve e aleatëve. Ju jap një këshillë, sigurohuni të keni një mik shqiptar, mund të mos keni nevojë për të, por një ditë, nëse ju duhet dikush, shqiptari është i pari që do ju vijë. Frederiksen e di këtë gjë, prandaj do pasaportë shqiptare”.