Eurojust publikoi detaje nga mega-operacioni ndërkombëtar i SPAK dhe Anti-Mafias së Barit në Itali, ku u shkatërrua një rrjet kriminal i përfshirë në vrasje, pastrim parash dhe trafikim ndërkombëtar droge, dhe që drejtohej nga shqiptarë. Gjatë operacionit të shtrirë në dy shtetet, Itali dhe Shqipëri, janë vënë në pranga 12 persona të dyshuar, si dhe janë lëshuar urdhër-paraqitje për tre të tjerë. Ky rrjet kriminal dyshohet se fshihet pas një vrasjeje të ndodhur vitin e kaluar në territorin italian. Sipas Eurojust, hetimi nisi pas vrasjes brutale të italianit Francesco Diviesti në rajonin e Barit në maj të vitit 2025. Një konflikt në një bar në Barletta degjeneroi më pas në ekzekutimin e të riut në një zonë të izoluar në Upper Murgia. Gjatë hetimeve për vrasjen, autoritetet italiane zbuluan lidhje me trafikun e drogës të menaxhuar nga një shtetas shqiptar, çka çoi më pas në identifikimin e një organizate kriminale të strukturuar që merrej edhe me pastrim parash mes Italisë dhe Shqipërisë. Nga të dhënat zyrtare të Eurojust, ky grup kishte arritur të pastronte rreth 1 milion euro të përfituara nga aktiviteti kriminal në Itali, duke i transferuar ato drejt Shqipërisë përmes një rrjeti të strukturuar me bazë në Tiranë.