Dy ditë më parë misioni ligj zbatues i Bashkimit Evropian në Kosovë njoftoi për shtimin e trupave të tyre. Në një përgjigje për Top Channel nga EULEX bëhet e ditur se janë shtuar 20 pjesëtar të xhandarmërisë së Lituanisë, kontigjentit rezervë në Fushë Kosovë që përbëhet nga 24 karabinierë italianë dhe 20 oficerë të tjerë lituanezë dhe që po patrullojnë edhe në pjesën veriore të vendit. "Xhandarët lituanez u vendosën për të përforcuar përkohësisht kapacitetin e Njësisë së Formuar të Policisë së EULEX-it, e cila është reaguesi i dytë i sigurisë në Kosovë, dhe përbëhet nga 105 policë polakë me bazë në Mitrovicë, në mënyrë që t'i përgjigjet nevojës së Misionit për të pasur forca shtesë në terren dhe të jenë në gjendje të mbështesin më mirë homologët kosovarë, nëse kërkohet dhe nëse është e nevojshme", thuhet tutje në përgjigjen e misionit. Shtimi i forcave të EULEX-it vjen pas një qetësie dy mujore në Veri, ndonëse mbrëmjen e enjtes pati shpërthim në "Lagjen e Boshnjakëve", në Veri të Mitrovicës, që nga Ministri i Brendshëm, Xhelal Sveçla u cilësua si reagim i serbëve ndaj arrestimeve të fundit për krime lufte. Megjithatë, njohësit e sigurisë shtimin e pjesëtarëve të EULEX-it e shohin si ulje e sovranitetit të Kosovës.