Rreth 100 kompani të mëdha teknologjike kanë firmosur një letër të hapur, ku bëjnë thirrje për bashkëpunim urgjent mes shteteve dhe sektorit privat përballë rrezikut në rritje të sulmeve kibernetike të fuqizuara nga inteligjenca artificiale. Alarmi vjen në kohën kur agjencia e lajmeve Reuters zbuloi një seri sulmesh kibernetike të kryera nga një grup hakerësh rusishtfolës, i quajtur AurOra , të cilët dyshohet se kanë përdorur një model të inteligjencës artificiale te Space X, Cursor, për të përshpejtuar sulmet ndaj kompanive. Sipas hetimit, të paktën 20 kompani janë goditur nga sulmet e kryera gjatë muajve prill dhe maj, mes tyre edhe një kompani italiane e sektorit të prodhimit, emri i së cilës nuk është bërë publik. Bëhet fjalë për vjedhje të dhënash dhe llogarish, me shumë gjasa të shoqëruara me kërkesa për shpërblim. Sulmet u zbuluan pasi disa biseda mes hakerëve dhe sistemit të inteligjencës artificiale u publikuan aksidentalisht në internet. Nga 28 sesione të zbuluara rezulton se hakerët arritën ta bindnin sistemin se po merrte pjesë në një simulim apo test sigurie.Në disa raste, inteligjenca artificiale refuzoi kërkesat, duke i konsideruar ato të paligjshme. Por hakerët rinisnin bisedat dhe e bindnin sërish sistemin se bëhej fjalë për një formë testimi. Ekspertët e sigurisë kibernetike paralajmërojnë se përdorimi i inteligjencës artificiale mund t’u japë kriminelëve një avantazh të madh, duke i bërë sulmet 30 deri në 50 për qind më të shpejta, pasi shumë procese që më parë kryheshin manualisht mund të automatizohen. Dhe pikërisht shpejtësia, paralajmërojnë ekspertët, mund të bëhet një nga armët më të rrezikshme të sulmeve kibernetike të së ardhmes.