Administrata Biden urdhëroi pezulimin e shpimeve për naftë në një pjesë të paprekur të Arktikut, duke vënë kështu në jetë një zotim të hershëm të presidentit amerikan për ta mbrojtur tundrën e brishtë të zonës nga nxjerrja e karburanteve fosile. Ky vendim i hap rrugën një procesi që mund të frenojë shpimet në njërin prej rajoneve më të mëdha të pacënuara të jetës së egër në SHBA, shtëpi e mijëra shpendëve migratorë e arinjsh polarë. Por nga ana tjetër, kjo zonë qëndron edhe mbi 11 milionë fuci nafte dhe demokratë e republikanë kanë luftuar mes tyre prej më shumë se 4 dekadash për t`i lejuar ose jo kërkimet e arit të zi atje. Një urdhër zyrtar tani nga sekretarja e brendshme, Deb Haaland, i pezullon aktivitete të tilla deri në përfundimin e një analize të plotë mjedisore të impaktit që mund të kenë shpimet mbi rajonin dhe rishikon vendimin e ish presidentit Donald trump për t`i dhënë atyre dritë jeshile. Levizja e Washingtonit në mbrojtje të natyrës vjen në një kohë kur përplasjet për Arktikun kanë marrë një vëmendje të madhe. Në fundin e muajit maj majit, gjate samitit te Këshillit të Arktikut në Islandë, Sekretari amerikan i Shtetit Antony Blinken dha alarmin mbi përforcimin ushtarak të Rusisë në rajon. NATO-ja ka shtuar nga ana tjeter edhe ajo aktivitetin ushtarak në Arktik. Muajt e fundit, bombarduesit e Forcave Ajrore amerikane janë stërvitur bashkë me forcat norvegjeze. Vitin e kaluar, presidenti rus Vladimir Putin njoftoi me pompozitet të madh një paketë 300 miliardë dollarëshe stimujsh për projekte të reja gazi dhe nafte në rajonin e Arktikut.