Dialogu Kosovë-Serbi dërgoi bashkë në selinë qendrore të NATO-s të dërguarin e SHBA-së për Ballkanin Perëndimor, Gabriel Escobar, si dhe i dërguari i Posaçëm i BE-së Miroslav Lajçak. Lajmi i bë i ditur nga misioni i SHBA-së në NATO, përmes një postimi në llogarinë zyrtare në Facebook, ku nënvizohet se paqja dhe stabiliteti në këtë rajon, janë të një rëndësie kyce për të gjithë europianët. “ Shtetet e Bashkuara, aleatët tanë të NATO-s dhe BE-ja janë të përkushtuara të punojnë me Serbinë dhe Kosovën për të gjetur një zgjidhje dhe rrugë përpara në interes të stabilitetit, sigurisë dhe mirëqenies së të gjitha komuniteteve”, thuhet në postim. Serbia rriti në fund të dhjetorit gadishmërinë ushtarake, në mesin e një përshkallëzimi të ri të tensioneve në veri të Kosovës, ku qytetarë serbë ngritën mbi dhjetë barrikada në rrugët që çojnë drejt vendkalimeve kufitare me Serbinë, Jarinjë dhe Bërnjak. Kjo në fakt, ishte pika kulmore e një viti të përshkuar i gjithi nga tensione, rrugë të bllokuara në veri, shkëmbime akuzash ndërmjet Prishtinës dhe Beogradit por edhe shtim të ndjeshëm nga ana tjetër të përpjekjeve ndërkombëtare për të gjetur një zgjidhje qoftë dhe të ndërmjetme për normalizimin e marrëdhënieve ndërmjet të dyja palëve. Vetë Escobar e pati cilësuar situatën si mjaft të rrezikshme, duke kërkuar lëshime të dhimshme edhe nga pala kosovare, sidomos për çështjen e Asociacionit të komunave me shumicë serbe.