I nominuari i presidentit të Shteteve të Bashkuara të Amerikës, Donald Trump, për ambasador në Shqipëri, Eric Wendt, ka marrë mbështetjen e Komitetit për Marrëdhënie me Jashtë në Uashington. Me 19 vota pro dhe 3 kundër, komiteti i ka dhënë dritën jeshile propozimit të Presidentit të Shteteve të Bashkuara. Emri i tij pritet të kalojë në seancën plenare të Senatit që do të thotë fjalën e fundit. Emërimi i Wendt u mbështet nga shumica e anëtarëve të komisionit, përfshirë senatorë nga të dyja partitë kryesore republikanet dhe demokratet në një votim që e çon kandidaturën një hap më afër konfirmimit final në Senat. Wendt pritet më pas të nisë misionin e tij në Shqipëri, ku prej vitit 2023 kur mbaroi mandati i ambasadores Yuri Kim, ambasada e ShBA në Tiranë është përfaqësuar nga i ngarkuari me punë. Gjenerali në pension, Eric Wendt, i nominuar nga Presidenti Trump për ambasador në Shqipëri, është një nga figurat më njohura të ushtrisë amerikane, me një karrierë mbi tre dekada në fushën e sigurisë dhe operacioneve speciale. Wendt shërbeu për herë të fundit si komandanti i 5-të i Shtabit të Operacioneve Speciale të NATO, detyrë që e mbajti deri më 29 janar 2021. Gjatë karrierës së tij si oficer i lartë, ai ka mbajtur disa poste kyçe, përfshirë rolin si Koordinator i Sigurisë së SHBA për Autoritetin Izraelito-Palestinez (2017–2019), si dhe pozicione drejtuese në Komandën e Paqësorit të SHBA dhe në strukturat e operacioneve speciale në Kore dhe Afganistan.