Tashmë presidenti turk Rexhep Tajip Erdogan dha dritën jeshile për anëtarësimin e Suedisë në NATO, pas një sërë zvarritjesh të gjata dhe sfilitëse për këtë të fundit. Sekretari i Përgjithshëm i NATO-s, Jens Stoltenberg, e shpërndau lajmin e rëndësishjëm në Twitter, krahas një fotoje me duar të shtrënguara. “Me kënaqësi të njoftoj se pas takimit në të cilin prita presidentin Erdogan dhe kryeministrin e Suedisë, Erdogan ka rënë dakord t'ia përcjellë protokollin e pranimit të Suedisë në Asamblenë e Madhe Kombëtare sa më shpejt dhe të sigurojë ratifikimin. Ky është një hap historik që i bën të gjithë aleatët e NATO-s më të fortë dhe më të sigurt”, shkruan Stoltenberg. Nga ana tjetër Suedia raportohet se ka rënë dakord të mbështesë përpjekjen e Turqisë për t'u bashkuar me Bashkimin Europian. Hungaria është tani i vetmi anëtar i NATO-s që nuk ka rënë dakord ende për anëtarësimin e Stokholmit në aleancë. Sekretari i Përgjithshëm i NATO-s Jens Stoltenberg, presidenti turk Rexhep Tajip Erdogan dhe kryeministri suedez Ulf Kristersson zhvilluan takimin e shumëpritur përpara se t’i bashkoheshin samitit të NATO-s në Vilnius, aty ku u arrit edhe hapi I rëndësishëm. Më herët lideri turk ka bllokuar pranimin e Suedisë për muaj të tërë për shkak të strehimit të militantëve kurdë që kanë zhvilluar një kryengritje të përgjakshme kundër shtetit turk. Situata u tensionua akoma më shumë pas djegies së Kuranit në Suedi, gjatë një proteste të zhvilluar. Mosmarrëveshja buroi nga një dakordësi që Turqia nënshkroi me Suedinë dhe Finlandën pasi fqinjët i dhanë fund dekadave të mos-angazhimit ushtarak dhe kërkuan strehim nën ombrellën bërthamore të ofruar nga NATO pasi Rusia pushtoi Ukrainën. Pamjet: AFP