Presidenti i Turqisë, Rexhep Taip Erdogan ka thënë se Izraeli mund të shënjestrojë edhe Turqinë pas Libanit. Në një fjalim në Parlamentin e Turqisë, Erdogan kritikoi komunitetin ndërkombëtar dhe po ashtu botën islame për dështimin për t’i ndaluar veprimet e kryeministrit të Izraelit, Benjamin Netanyahu në Gaza dhe Liban. Ai u zotua se do të qëndrojë fortë kundër Izraelit dhe do ta mbështesë Libanin. “Edhe pse disa njerëz vazhdimisht refuzojnë ta shohin atë, Qeveria e Netanyahut po ëndërron, po ju them se është një ëndërr e papërpunuar që përfshin edhe Anadollin”, tha Erdogan, duke iu referuar një pjese të madhe të Turqisë. “Vendi të cilit Izraeli do t’ia vë syrin pas Palestinës e Libanit, do të jetë atdheu ynë”, shtoi ai. Presidenti i Turqisë përsëriti edhe një herë se vendet islamike duhet të themelojnë një aleancë kundër asaj që ai e cilësoi si “kërcënim në rritje” nga Izraeli për të okupuar territore. “Hapi i vetëm që do ta ndalë arrogancën izraelite është një aleancë e shteteve islamike”, tha Erdogan.