Organet e drejtësisë në Turqi kanë lëshuar urdhër-arreste për kryeministrin izraelit, Benjamin Netanjahu, dhe zyrtarë të tjerë të qeverisë izraelite, nën akuzën për gjenocid. Ndër 37 të pandehurit janë ministri izraelit i Mbrojtjes, Israel Katz, ministri i Sigurisë Kombëtare dhe Shefi i Shtabit të Përgjithshëm, njoftoi Zyra e Prokurorit të Përgjithshëm të Stambollit. Lista e plotë nuk është publikuar ende. Sipas njoftimit, individët e kërkuar akuzohen për gjenocid kundër palestinezëve dhe krime kundër njerëzimit. Mijëra vetë kanë humbur jetën në Rripin e Gazës, mijëra të tjerë janë plagosur dhe zonat e banimit janë bërë të pabanueshme, thuhet më tej në deklaratën e prokurorisë. Izraeli e hodhi poshtë kategorikisht akuzën. Ministri i Jashtëm Gideon Saar e quajti atë "mashtrimin e fundit propagandistik" të Presidentit turk, Rexhep Tajip Erdogan, të cilin ai e quajti "tiran". Grupi islamist Hamas, sulmi masiv i të cilit ndaj Izraelit më 7 tetor 2023, shkaktoi luftën në Rripin e Gazës, e përshëndeti veprimin e Turqisë. Hamasi klasifikohet si organizatë terroriste nga Shtetet e Bashkuara të Amerikës dhe Bashkimi Evropian.