Presidenti turk Rexhep Tajip Erdogan akuzoi të martën Greqinë për një "pushtim të fshehtë" të ishujve të Egjeut lindor. "Armët që ata po grumbullojnë nuk kanë rëndësi për ne, sepse forca jonë është shumë më e madhe se e tyre, por ju kujtojmë se kjo do të thotë një pushtim i fshehtë," tha Erdogan në një takim me anëtarë të partisë së tij AKP në Ankara. Komentet e presidentit turk erdhën një ditë pasi Ankaraja pretendoi se automjete të blinduara po transportohen në Egjeun Lindor duke shkelur kështu statusin e tyre të supozuar të "çmilitarizuar". Në të njëjtin takim të martën, Erdogan akuzoi gjithashtu Greqinë se është ndër vendet evropiane që strehojnë terroristë. Erdogan tha se Turqia nuk dëshiron që Deti Egje dhe Deti Mesdhe të mbulohen me gjak e armiqësi. “asnjë nga këto mobilizime ushtarake dhe as ato mbështetje politike apo ekonomike nuk mjaftojnë për ta ngritur Greqinë në nivelin tonë. Megjithatë, këta hapa të gabuar janë të mjaftueshëm për ta tërhequr Greqinë në një moçal në çdo kuptim.”, tha presidenti turk. Greqia dhe Turqia, të cilat janë të dyja pjesë e aleancës mbrojtëse të NATO-s të udhëhequr nga SHBA-ja, janë grindur për vite me radhë mbi kufijtë detarë dhe të drejtat e eksplorimit të energjisë në detin Egje dhe në detin lindor të Mesdheut.