I dërguari i posaçëm i presidentit amerikan Donald Trump, Steve Witkoff, është takuar të premten me presidentin rus Vladimir Putin në Shën Petersburg, në përpjekje për të nxitur armëpushimin në luftën Rusi-Ukrainë. Ky është takimi i tretë mes Witkoffit dhe Putinit vetëm këtë vit, ndërkohë që përpjekjet diplomatike nga SHBA-ja nuk kanë sjellë ende marrëveshje të plotë për ndaljen e luftimeve në Ukrainë. Në një postim në rrjetet sociale, Trumpi i bëri thirrje Putinit që të veprojë për të ndalur luftën. “Rusia duhet të lëvizë. Shumë njerëz po vdesin, mijëra në javë, në një luftë të tmerrshme dhe të pakuptimtë”, shkroi Trump. Takimi ndodhi në të njëjtën kohë kur Mbretëria e Bashkuar dhe Gjermania kryesuan një takim të aleatëve të Ukrainës në Bruksel, ku 50 vende u dakordësuan për një paketë ndihme ushtarake prej 21 miliardë euro për Kievin. Përpara bisedimeve me Putinin, Witkoff u takua me Kirill Dmitriev, kreun e fondit rus të pasurisë sovrane, gjatë një konference në Grand Hotel Europe në Shën Petersburg. Dmitriev vizitoi Uashingtonin javën e kaluar, duke u bërë zyrtari më i lartë rus që ka udhëtuar në SHBA që nga nisja e pushtimit të Ukrainës në shkallë të gjerë. Zëdhënësi i Kremlinit, Dmitry Peskov, theksoi se nuk priten përparime të mëdha në këtë fazë, duke shtuar se “procesi i normalizimit të marrëdhënieve është në vazhdim”. I pyetur nëse takimet mund të shtrihen drejt organizimit të një takimi të mundshëm mes Trumpit dhe Putinit, Peskov u shpreh: “Le të shohim. Varet