23 emigrantë nga Lindja e Mesme janë marrë peng nga disa të rinj shqiptarë. Mësohet se emigrantët kishin kaluar kufirin e gjelbër nga Greqia në Shqipëri në mënyrë klandestinë dhe më pas kanë rënë pre e grabitësve shqiptarë, të cilët i kanë mbajtur peng për disa orë në një banesë të braktisur në Maliq. Policia ndërhyri në kohë duke liruar emigrantët dhe prangosur autorët, Kristiano Ajasllari, 38 vjeç nga Maliqi , si dhe Adri e Elsi Levendi të dy 24 vjeç dhe banues në Vlorë. Nga hetimet ka rezultuar se tre të rinjtë kishin transportuar emigrantët me një furgon dhe më pas i kishin fshehur në një banesë e braktisur. Nëpërmjet kërcënimit tre autorët u kanë marrë emigrantëve celularët. Në këmbim të lirisë së tyre autorët ju kishin kërkuar emigrantëve 10.000 euro. Shtetasi Adri Levendi, sapo ka konstatuar se ishte në ndjekje nga Policia, ka tentuar të largohet me shpejtësi duke mos iu bindur urdhrit të punonjësve të Policisë, për të ndaluar, por menjëherë është kapur dhe neutralizuar.'- njofton policia. Policia ndërhyri shpejt duke vënë në pranga grabitësit dhe duke sekuestruar 3 makina, një shumë parash, celularë dhe një shkop metalik, të ngjashëm me atë të policisë.