Numri i refugjatëve që jetojnë në Gjermani ka mbërritur nivelin rekord të 3.48 milionë vetëve. Pak më shumë se një milion prej tyre vijnë vetëm nga Ukraina. Në total, ata përfaqësojnë tani 4% të popullsisë, cka nuk kishte ndodhur ndonjëherë më parë. Shifrat i përcjell gazeta Neue Osnabrücker Zeitung, që ka përfshirë në bilanc të gjithë njerëzit, pavarësisht nga leja e tyre e qëndrimit, të cilët aktualisht kërkojnë mbrojtje në Gjermani për arsye humanitare, nga azilkërkuesit deri te refugjatët e njohur apo personat e toleruar. Për shkak të dëbimeve dhe largimeve, numri i personave në Gjermani që detyrohen të largohen nga vendi është në rënie, vijon raporti. Në mesin e vitit 2024, statistikat regjistruan 226.882 persona të detyruar të largoheshin nga Gjermania, 15.760 më pak se në fund të vitit 2023. Clara Bünger, zëdhënëse e politikës së refugjatëve për grupin e Majtë në Bundestag, kritikoi debatin e imigracionit në Gjermani në dritën e këtyre shifrave. "Në Gjermani aktualisht jetojnë pothuajse 3.5 milionë refugjatë, shumë prej të cilëve kanë qenë këtu për dekada; kjo është vetëm katër përqind e popullsisë," i tha Bünger gazetës së njohur.