Belgjika po shqyrton mundësi të reja për të rritur largimin e emigrantëve të paligjshëm, duke e kthyer vëmendjen nga Shqipëria dhe Kosova. Ministrja belge e Azilit dhe Migracionit, Anneleen Van Bossuyt, ka deklaruar për “Euronews” se qeveria po merr në konsideratë “çdo zgjidhje të mundshme”, përfshirë edhe marrjen me qira të hapësirave në burgje jashtë Belgjikës. Sipas saj, në Shqipëri po diskutohen opsione për strehimin e shtetasve shqiptarë dhe jo vetëm që vuajnë dënime në burgjet belge, ndërsa për Kosovën bëhet fjalë për transferimin e personave që ndodhen ilegalisht në Belgjikë dhe janë të burgosur atje, pavarësisht kombësisë. “Po shqyrtojmë çdo zgjidhje të mundshme për të rritur shkallën e kthimeve. Ne kemi qenë në Shqipëri dhe Kosovë, kemi folur me ministrat përgjegjës, por ndoshta në të ardhmen do të ketë edhe mundësi ose vende të tjera. E rëndësishme të shohim se ku mund ta kemi këtë lloj zgjidhjeje” Nga ana tjetër, kryeministri Edi Rama ka përsëritur se Shqipëria ka marrëveshje për strehimin e emigrantëve vetëm me Italinë dhe ka përjashtuar bashkëpunime të ngjashme me vende të tjera.