Në samitin e parë në botë për sigurinë e inteligjencës artificiale, vende si Britania e Madhe, Shtetet e Bashkuara dhe Kina ranë dakord për "nevojën urgjente për të kuptuar dhe menaxhuar kolektivisht rreziqet e mundshme përmes një përpjekjeje të re të përbashkët globale për të siguruar që Inteligjenca Artificiale të zhvillohet dhe vendoset në një mënyrë të sigurt dhe të përgjegjshme për të mirën e komunitetit global". Deklarata u nënshkrua nga 28 vende dhe Bashkimi Evropian. Kryeministri i Britanisë së Madhe, Rishi Sunak e quajti deklaratën një "arritje historike" ndërsa Mbreti Charles III, në një video mesazh drejtuar samitit, kërkoi bashkëpunim ndërkombëtar për të luftuar "rreziqet " e zhvillimit të pakontrolluar të Inteligjencës Artificiale. Miliarderi i SpaceX, X dhe CEO i Teslës, Elon Musk deklaroi se inteligjenca Artificiale (AI) është një nga "kërcënimet më të mëdha" të njerëzimit dhe nevojitet konsensus se si të zhvillohet një kornizë për ta rregulluar atë. "Këtu jemi, për herë të parë, me të vërtetë në historinë njerëzore, me diçka që do të jetë shumë më inteligjente se ne. Kështu që nuk është e qartë për mua se ne mund ta kontrollojmë një gjë të tillë. Mendoj se ne mund të aspirojmë ta drejtojmë atë në një drejtim që është i dobishëm për njerëzimin”, tha Musk në samitin e mbajtur në Mbretërinë e Bashkuar. Ministrja e teknologjisë në Mbretërinë e Bashkuar, Michelle Donelan i tha AFP-së se deklarata "tregon vërtet për herë të parë se bota mblidhet për të identifikuar këtë problem dhe për të vlerësuar e zbutur rreziqet e teknologjisë me zhvillim të shpejtë. Pamjet: AFP