Elon Musk rezulton me një kompensim rekord prej 158 miliardë dollarësh për vitin 2025 nga Tesla, por në realitet nuk do të marrë asnjë prej tyre, të paktën për momentin. Sipas dokumenteve zyrtare të dorëzuara në autoritetet amerikane, kjo shumë përfaqëson një vlerësim teorik të pagesës që Musk mund të përfitojë nëse arrin një sërë objektivash tepër ambicioze të vendosura nga aksionarët e kompanisë. Paketa gjigante e shpërblimit lidhet me performancën afatgjatë të Teslës dhe bëhet e pagueshme vetëm nëse kompania arrin nivele të jashtëzakonshme rritjeje, përfshirë rritjen e vlerës së tregut deri në 8.5 trilion dollarë. Analistët theksojnë se këto objektiva janë ende larg realizimit, çka do të thotë se shuma prej 158 miliardë dollarësh mbetet aktualisht vetëm në letër. “Musk nuk do t’i fusë në xhep këto para. Është një premtim që lidhet me arritjen e rezultateve shumë të larta”, vlerësojnë ekspertët financiarë. Mes kushteve kryesore që duhet të përmbushë janë rritja e prodhimit në 20 milionë automjete në vit, zhvillimi i një flote prej një milion robotaxi autonomë dhe sigurimi i miliona abonimeve për sistemin e drejtimit automatik. Nëse këto objektiva realizohen, Musk mund të përfitojë aksione shtesë të Teslës me vlerë që mund të arrijë deri në 1 trilion dollarë, një shifër pa precedent në historinë e biznesit. Megjithatë, për momentin, marrëveshja shihet më shumë si një strategji për të motivuar dhe mbajtur të fokusuar miliarderin tek Tesla, ndërsa kompania përballet me konkurrencë në rritje në tregun global të automjeteve elektrike. Aktualisht, Musk mbetet personi më i pasur në botë, por kjo paketë rekord tregon se pjesa më e madhe e pasurisë së tij varet nga performanca e ardhshme e kompanisë që drejton.