Starlink, një degë e kompanisë amerikane të hapësirës ajrore SpaceX tanimë është edhe në Shqipëri. Lajmin e mirë për vendin tonë e ka njoftuar vetë biznesmeni i njohur amerikan, Elon Musk përmes një postimi në platformën X. “Starlink tani në Shqipëri”, shkruan Musk. Starlink është plejada e parë dhe më e madhe satelitore në botë, që përdor një orbitë të ulët të Tokës për të ofruar internet me brez të gjerë të aftë për të mbështetur transmetimin, lojërat në internet, video-thirrjet dhe më shumë. Duke shfrytëzuar satelitët e avancuar, Starlink ofron internet me shpejtësi të lartë dhe me vonesë të ulët për përdoruesit në të gjithë botën. Aktualisht starlink është aktiv në mbi 70 shtete të botës. Fillimisht pati një shpërndarje në një pjesë të shteteve të bashkuara të Amerikës, ndërsa më pas u zgjerua edhe në territore të tjera. Starlink sot është i disponueshëm edhe në Itali, Spanjë, Francë, Austri, Brazil, Kili etj, ndërkohë në të ardhmen pritet të aktivizohet edhe në Mbretërinë e Bashkuar, dhe Danimarkë. Starlink është aktiv edhe në vende të Ballkanit si Kroacia, ndërsa pritet të bëhet aktiv në Kosovë, Serbi, Mali i Zi dhe Bosnjë Hercegovinë. Ky shërbim është veçanërisht i favorshëm për banorët që jetojnë jashtë qyteteve, ku interneti kabllor është i vështirë për t’u lidhur. Cilësia që ofrohet nga Starlink është shpesh herë me e lartë dhe më e shpejtë se ajo e kabllorëve. Abonimet mund të kryen përmes faqes zyrtare të internetit. Nga një vëzhgim i thjeshtë që Top Channel bëri në ëebsajtin zyrtar për çmimet që kjo kompani do të ofrojë për Shqipërinë, rezulton që ato të jenë më të reduktuara. Sipas të dhënave që jep ëebsajti zyrtar, paneli që do vendoset mbi taracën tuaj do të kushtojë 42 mijë e 500 leke plus 2 mijë e 400 lekë posta. Ndërsa pagesa mujore për të përfituar internetin me shpejtësi të lartë është është 6 mijë e 500 lekë në muaj. Krahasuar me Shtetet e Bashkuara ku çmimi mujor për shërbimin është 100 dollarë në muaj, rezulton që tarifa për Shqipërinë të jetë më e lirë. Paneli që vendoset në taracën tuaj merr internet direkt nga mijëra satelitët që Elon Musk ka ngritur në hapësirë. SpaceX nisi lëshimin e satelitëve Starlink në vitin 2019 dhe që nga fillimi i marsit 2024, kompania numëron mbi 6000 satelitë të vegjël të prodhuar në masë në orbitën e ulët të Tokës që komunikojnë me marrës të caktuar tokësorë. Objektivi i kompanisë është vendosja e 12 mijë satelitëve në hapësirë. Pamjet: AFP