Një atentat mafioz ndodhi këtë mbrëmje në Lezhë, ku u ekzekutua me armë zjarri Gjovalin Prendi. Ngjarja e rëndë ndodhi në zonën e Pllanës, në Lezhë, në afërsi të biznesit familjar. Atentati dyshohet të jetë i mirëorganizuar, me tipare të qarta mafioze, ndwrsa autorët janë larguar menjëherë pas krimit. Në këtë biznes ka kamera sigurie, që policia pritet t’i sekuestrojë për të hetuar mbi ngjarjen dhe mundësinë e identifikimit të autorëve. Prendi mbeti i plagosur dhe u dërgua me urgjencë në spitalin e Lezhës, por si pasojë e plagëve të marra, nuk mundi të mbijetojë. Forca të shumta të Policisë kanë shkuar në drejtim të vendit të ngjarjes të mbështetura nga Forca Kombëtare e Sigurisë, Njësia Shkodër. Ndërkohë është ngritur një grup i posaçëm hetimor i cili ka shkuar në vendin e ngjarjes, dhe nën drejtimin e Prokurorit, po kryejnë veprimet hetimore me qëllim zbardhjen e ngjarjes. Ndaj Gjovalin Prendit, ishin organizuar edhe dy sulme të tjera, njëri me eksploziv dhe me një tjetër armë zjarri. Në të dy rastet, pati dëme materiale dhe jo të lënduar.