Gjashtë prej të dyshuarve për vrasjen e rreshterit Muhamed Lika, janë lënë në paraburgim prej një muaji. Haki Bela, Rilind Murati, Vatan Çaka, Edmond Lika, Shkëlqim Kuka dhe Diamant Gashi, u arrestuan më 21 prill, pasi dyshohet se me dashje dhe përgatitje kanë kryer vrasjen e Likës më 1 prill të këtij viti. Sipas Prokurorisë Themelore në Ferizaj i dyshuar si kryrësi i vrasjes është i mituri Rejhan Bela i cili ka qenë i ndihmuar në vazhdimësi nga gjashtë të dyshuarit e moshës madhore. Kërkesa e prokurorisë për caktimin e masës së sigurisë ndaj të pandehurve sqaron rrjedhën e ngjarjes dhe planin për vrasjen e rreshterit të policisë së Kosovës, Muhamed Likës. Viktima që nga përfundimi i orarit të tij në stacionin e Policisë në Kaçanik ishte përcjellë nga gjashtë të dyshuarit që të martën u paraqitën në Gjykatën Themelore në Ferizaj. "I mituri Rejhan Bela i shkon nga prapa dhe pasi që viktima hyn në objektin banesor pas tij hyn edhe i mituri ku me të takuar të ndjerin ka shtënë në drejtim të tij më armë zjarri", sqarohet nga prokuroria. Pas kryerjes së veprës penale i mituri largohet nga vendi i ngjarjes duke vrapuar ku takohet me të dyshuarin tjetër Rilind Murati i cili ka qenë deri në vitin 2022 pjesëtar i Forcës së Sigurisë së Kosovës. I dyshuari Haki Bela, sipas prokurorisë ka vëzhguar viktimën, Muhamed Likën që nga momenti kur ka dalë nga puna në natën e vrasjes së tij. Po ashtu, Bela pas vrasjes së rreshterit, sipas prokurorisë ka shkuar në vendin e ngjarjes ku ka qëndruar dy minuta. Vatan Çaka, bashkë me Rilind Muratin dhe të miturin Rejhan Bela paraprakisht kanë vëzhguar vendin e ngjarjes dhe për këtë prokuroria ka si dëshmi kamerat e sigurisë. Edhe dy të pandehurit e tjerë, Edmond Lika dhe Shkëlqim Kuka po ashtu kanë ndihmuar në përcjelljen e viktimës. Ndërkohë bëhet e ditur se i pandehuri Diamant Gashi pas vrasjes ka ndihmuar të miturin Rejhan të largohet nga vendi i ngjarjes. Po ashtu, përmes telefonit kontakton të pandehurin Haki Bela dhe i njëjti e strehon dhe i ofron ndihmë ne ushqim dhe gjana tjera të miturit Rejhan Bela. Sipas mbrojtjes, të dyshuarit Rilind Murati dhe Diamant Gashi kanë mohuar përfshirjen e tyre në vrasjen e rreshterit Lika, derisa mbrojtja po ashtu ka sqaruar se nuk ka dyshime se në rast lidhen bindjet fetare të të pandehurve.