Burg përjetë vendosi Gjykata kundër Krimit dhe Korrupsionit për Xhulian Hoxhën ndërsa dënoi me 17 vite Euglen Halilin, dy të akuzuarit për vrasjen e Emiljano Ramazanit dhe Regis Runajt në Elbasan. Krime këto që ndodhën më 20 dhe 29 korrik të vitit 2020. Vendimi u dha këtë të mërkurë. Sipas gjykatës, Hoxha do e kryej dënimin në një burg të sigurisë së lartë ndërsa shoku I tij, Euglen Halili do të mbahet në njërin prej burgjeve ku strehohen bashkëpunëtorët e drejtësisë. Për të dy autorët Gjykata dha dënime më të rënda sesa kishte kërkuar SPAK. Vrasjet dyshohet se u kryen për llogari të Erion Alibejt. Fillimisht u ekzekutua Emiljano Ramazani. Ai u vra poshtë shtëpisë së tij teksa po parkonte automjetin. Vrasja e tij mendohet se ndodhi për larje hesapesh për drogën. Më pas Xhulian Hoxha së bashku me mikun e tij Euglen Hallili vranë me thikë Regis Runajn, trupin e të cilit e hodhën në afërsi të varrezave të qytetit të Elbasanit.